BEKUNGESIKHATHI esingakanani nje,
lapho iningi lezakhamuzi zakulelizwe bese zimhleba zithi sekuphelile ngobuholi
balowo owayekade enguMkhuzi wamaPhoyisa kwelaseNingizimu Afrika.e
Kepha-ke, labo akhula kanye nabo
endaweni yaseNgcotsheni, Fairview Mission, eMzumbe, ngaphansi koMkhandlu
kaMasipala woGu, bavele bathi soze' "kuphele kalula kangaka ngo'S'bheka,
uNoNkemba, siphethe iSiqwayi noBhoko" besho bemhaya ngezobusha esaliBhungu
endaweni yangakubo.
Nakube mina ngize ngaqala ukumazi nokusondelana
naye, esevele etohoza ekuqaleni kweminyaka yangawo'1980, esebenzela esibhedlela
saseASSISI Mission Hospital, nokho nami wangihlaba umxhwele ngokukhalipha,
nakube wayesethe ukuba mdala ngeminyaka kunami.
Kodwa-ke,ingqikithi yokubhala kwami
namuhla kungukubuka amagalelo uNdosi asebe nawo ekukhuliseni intando yeningi
kulelizwe, kuhlanganisa nokuzinikela ngokungachezuki emigomweni yeqembu
ayilunga nakholelwa kwinkambiso nezinjongo zalo.
Esanda kukhonjwa indlela
nguMongameli weZwe, njengoKhomishana wamaPhoyisa kulelizwe, ngiyamkhumbula
uCele eziphendulela kwimithombo yabezindaba ngokuthi; "Selokhu ngawujoyina
lombutho kaKhongolose, angikaze nangelilodwa ilanga kengifake isicelo
somsebenzi kulona. Bekuhlale kuba nguwo uANC obuzibonela indlela enguwusebenzela
ngayo, bese kuba nguwo ongithumelayo lapho ubona ukuthi ngikufanele
ukuyowusebenzela khona. Kuliqiniso ukuthi ngisazihlalele ekhaya
ngingenamsebenzi, kodwa-ke, ngisazoqhubeka nokuwusebenzela umbutho
engisakholelwa kuwona," ngimcaphuna njengoba awaphimisa lamagama
uS'bheka.
Nakube kwayiwa engqungqutheleni
yamaShumi amaHlanu naNtathu (53rd conference) tyeQembu likaKhongolose,
kusekusha ukukhonjwa indlela kwakhe ekuholeni lomnyango kaHulumeni, kepha
izithunywa ezazihambele leNkomfa zakhombisa ukumethemba njengomholi ezingeni
likaZwelonke.
Imiphumela yokhetho lwezikhundla
eziphezulu zeqembu zamvuna ngoba wathola imiphumela ehlabahlosile futhi wangena
egijima ngokuba ilungu lesigungu esiphezulu seqembu (Natetional Executive
Committeee/ NEC).
Sizokhumbula futhi sonke, ukuthi
kungekudala kulesifundazwe, ngesikhathi ezingeni likaHulumeni wesiFundazwe
saKwaZulu-Natal kwenziwa izinguquko, igama likamnumzane Bheki Cele liphinde
lasabala kwimithombo yabezindaba njengelinye ebekungathekiswa nobengathola ithuba
lokuphinde aqokelwe ukuba nguMphathiswa. Nokho-ke sekungumlando ukuthi
akusakwenzekanga njengezifiso zeningi lezakhamuzi.
Ngiqhakambisa lendathane yothando
ngoBheki Cele esibonakala ngokwethenjwa yizakhamuzi kuye cishe okuhlanganisa
zonke izakhamuzi zakulesifundazwe.
Lapha ngingabala ukusebenza
ngokuzikhandla kwakhe ekunqandeni ubugebengu njengelungu leDurban North
Community Policing Forum, abalandeli namalungu eANC Youth League eNyevesi
yaKwaZulu-Natal (Westville Campus), indlela amukelwa ngayo emngcwabeni walowo
owabe eyisikhulu samaTekisi, eNanda muva-nje, kanye nezindimbane zabalandeli
beqembu likaKhongolose ebezihambele i"SIYANQOBA ANC RALLY" KwaNongoma
ngeledlule.
Kade ngizama ukuhosha umoya
kwabahola uKhongolose kulesifundazwe ngalo"Zamlandela onguNdosi' kamuva
nje kuzozonke izigaba namazinga emiphazkathi esiyakhele, akubanga khona
ozimisele ngokuphuma nezwi eliyikho nelibambekayo ngekusasa likaMfaka'Magaye.
Kepha, ingxoxo engake ngaba nayo
eminyakeni edlule nalabo ayeqale naye esikoleni emazingeni aphansi (kwafestiye
kuze kube kuStd 2) eMagog Primary School, okungulowo owake waba
liSekela-Ngqogqoshe wezokuVikela (Deputy Minister of Defence) kulelizwe,
uNkosikazi Nozizwe Madlala-Routledge, bekanye nalowo oyiSikhulu eMnyangweni
wezeNhlakahle neziMpesheni kulesiFundazwe (Dept of Social Development &
Welfare) uDokotela Langalibalele Mqadi, bakubeka ngokusobala ukuthi,
"UNonkemba uyindoda ekhule yaziwa ukuthi iyaphikelela futhi ayisona nje
isahluleki. Futhi uma ephinda enikezwa amathuba okuhola usazozibonalisa
ngokwedlulele. Buza noma ngubani kulesifundazwe ukuthi izinga lobugengu
obuhleliwe baba kuliphi izinga ngesikhathi esazibambele yena mathupha
kulomnyango."
Kungalokho ngikusho kugcwale umlomo
ukuthi lesifundaze sakwelika'Mthaniya, kanye nalolonke izwe laseMzansi,
lisazoyihuba kabusha ingomaz ethi, "loMagaye waseMzumbe ufana ncamshi
neDangabane."
END.
