MAZIKHOKHELWE IZIDINGO-NGQANGI KUHULUMENI WENTANDO YABANTU

"ASINAMALI, ASIMELWE, AZIKHWELWA"-- zonke lezizaga zabe zihaywa kushubile emalokishini ayehlala abantu abamnyama kulelizwe ngeminyaka lapho ubandlululo lwabe ludla lubi kulelizwe laseNingizimu Afrika.

Kodwa-ke isithombe esisanda kudwetshwa nguNgqongqoshe obhekele ezeziMali, nokuqoqwa kweNtela kulelizwe, umnumzane Pravin Gordhan, ngokuphatha ngokungeyikho ngabaphathi bakaMasipala izimali zabakhokhi-ntela kufaka ungabazane ngobuholi bohulumeni basemakhaya.

Ngesikhathi enekela izwe ePhalamende eKapa kulelisonto, ngendima eseyikhathuliwe ngokusebenzisa iSabelo-ziMali (medium Term Budget) zonyaka ka 2011/12, uMphathiswa uzwakalise ukuthi sekuzodingakala kusetshenziswane ngokukhulu ukubhekisisa ekuphathweni kanye nasekuqoqweni izimali zentela kohulumeni abasemazingeni aphansi.

Nakube kunjalo, usahamba kahle umgqigqo kahulumeni wokuhlinzeka ngamathuba okwakha imisebenzi (Expanded Public Works Programme) kuwowonke amazinga kahulumeni, kugcizelela umnumzane Gordhan.

Ngezikhathi usasha umzabalazo wokugqugquzela ukungazikhokheli izidingo-ngqangi zikahulumeni wobandlululo emalokishini, anjengoLamontville, Sobantu, Khayelitsha, Alexander, Soweto, Hambanathi, namanye amaningi, kwabe kulikhwelo elalizwakakala ngoba babengekho abaholi bomphakathi ababekhethwe izakhamuzi.
Kepha abaholi-mbumbulu bangalesosikhathi kwabe kuyizichuse-nje ezazinhlanhlatha zimpampiswa inkambiso yamaBhunu ukuqhubezela ukugcindezelwa kwamanyama kulelizwe.

Kungaleliphuzu lapho kungethusile ukuvela nokudwetshwa kwesithombe sokuthi loMnyango oqoqa izintela kulelizwe ukweletwa izizumbulu ezibalelwa ngaphezulu kwezigidigidi zika R62.3 billion ngohulumeni boMasipala.

Uma ebabala uNgqongqoshe Gordhan, sebebonke abaphathi ababudedengu ngezimali zabakhokhi-ntela batholakala komasipala abangamakhulu amabili namashumi ayisishiyagalombili nantathu (283 municipalities in serious debt) futhi basabalele nezwe lonke.

Ngeminyaka yobandlululo kwakunesisho esithi,phecelezi;"Without representation, No taxation"-
Sikhokhiselwani, Sikhokhelani, Sizokhokhelani ngoba simelwe ngahaholi abangonopopi bamaBhunu, abasitshela ukuthi bayenziwe kanjani intuthuko ezindaweni esihlala kuzo, kodwa abangafuni ukulalela uvo lwethu na.

"Mphakathi, Zakhamuzi ezakhele lelizwe laseNingizimu Afrika, kufanele nizikhokhele zonke izidingo-ngqangi enizisebenzisayo lapho nihlala khona (municipal services).
Akwamukelekile neze ngezikhathi zikahulumeni wentando yabantu ukungazikhokheli izidingo zempilo enizilethelwa nguhulumeni owakhethwa yinina.
Singumnyango obhekele ukuqoqa iFa likaHulumeni (National Treasury) sizimisele ukusebenzisana nabaholi beSouth African Local Government Association (SALGA) kanye ne South African National Civics Organization (SANCO) ukukhuthaza isiko lokuqoqa nokuzimisela kwethu sonke siyizakhamuzi ukukhokhela izidingo-ngqangi (rates) ezindaweni esihlala kuzo" kugcizelela uGordhan.

NgingowaseMaqadini, nami ngihlaba ikhwelo lokuthi abaholi bethu emazingeni asondelene nathi (emakhaya) mababe isiphefu esizokhanyisa ngokuyikho ngokusebenza kukahulumeni owakhethwa ngabantu kulelizwe.

Ongumholi oqavile wezinyunyana zabasebenzi bakaMasipala, umnunzane Ntokozo Nzuza, uvele wakhomba ngenjumbane izikhulu thizeni kuhulumeni womasipala ngokuzibhekelela bona bodwa ngezimali zabakhokhi-ntela.
"Ekungabe kuhlinzekelwa izidingo-ngqangi zezakhamuzi, imiholo yabasebenzi eyamukelekayo nephilisayo, kanye nokugqugquzela ukuba omasipala baholwe ngendlela ehlelekile, uthola abaphathi beziholela izizumbulu zezimali kanye nokuzenzelela kwimisebenzi ekhishwayo yokulungisa ingqala-sizinda kulabohulumeni" wabeka kanje.

Mangiphetha lesiphakamiso sokusebenzisana ngokuyikho emazingeni kahulumeni womasipala, ngithanda ukuyigqobha ngamazwi ashubile aphinyiswa kungekudala nguMphathi-Jikelele (Director-General) woMnyango wokuqoqa iziNtela zikaHulumeni, umnumzane Lungisa Fuzile.

"Kulihlazo, futhi kuyenyanyisa ukuthi kuseneminyango kahulumeni eseyehluleke yancama ukukhokhela intela kahulumeni.
Okusixakayo ngukuthi lezizumbulu ziphelelaphi noma zisebenzaphi ngoba sisuke sesibabele abazoyisebenzisa ngokukhokhela lamabhilidi abasebenzela kuwo.
Futhi sisuke sihlephule kuyona kanye lemali yabakhokhi-ntela kusale esesizohlinzekela ngayo ukuhambisa izidingo-ngqangi kwimiphakathi yethu" kubalisa umnumzane Fuzile.

Nokho okunika ithemba isibophezela sakhe sokuthi baphezu kokwakha uhlelo oluzolwisana nokungcola, ukweba kanye nobugebengu (corruption0 obudlangile kubaphathi beminyango emikhulu kohulumeni basemakhaya, ngoba, ngokusho kwakhe, lokuhluleka ukukhokhela intela kahulumeni kunomthelela ekuhlinzekeleni ngezidingo-ngqangi kwimiphakathi eyakhele lezozindawo.

KZN--MALUSHE UCHATHO LWASEMANGAUNG!

KULINDWENI wezakhamuzi zakulesifundazwe sikaMthaniya njengoba koLimpopo kanye naseGauteng seluvuthiwe loludaba.

Masiluqale manje, malushe-ke uchatho lwangempela, masiwuvukuze umphakathi wethu kulesifundazwe ukuze sithi siwugojela lonyaka ophezulu kube sekucace okwekati elimhlophe ehlungwini ukuthi lesifundazwe sisazophinda simthwale ngeqoma uMsholozi kwinkongolo kaZibandlela wonyaka ozayo (December 2012 ANC Elective Conference).

Noma lesiphakamiso singeyukuzwakala kahle kumaphixi-phixi thizeni akhele lesifundazwe soBabu Albert Luthuli, kodwa-ke, iqiniso elingephikwe ngelithi noma sitshelwa ngabaholi ukuthi loludaba alukavulelelwa ukuxoxwa esidlangalaleni, ngingowaseMaqadini, ngingekuvumele ukukhohlisa unembeza ngiwuhlabe inhlali zibe izinto zishuba la emnyango.

Nguyena muphi owakhele lesifundazwe ongasaboni manje ukuthi imvunge yokuhola lesikhondlakhondla seqembu ngonyaka ozayo, isivele igcwele emasontweni, emafemini, ezikoleni, ezibhedlela, ngisho nasemarenki amatekisi seliyashumayezwa lelivangeli lokugudluza osesihlalweni.

Sikhuluma nje eGoli-ke likansondo (kwisifundazwe saseGauteng) sebeze baqhembukelana bamaqembu-qembu ngakho belu ukuqhakambisa umkhankaso wokuthi ngubani asebemkhankasela ukuhola uKhongolose ngemuva kwaseMangaung.
KwesaseLimpopo isifundazwe, uNxamalala usephenduke iqaqa kulezingane ezingezwa.

NjengoMzulu phaqa, futhi oziqhenyayo ngokuthi lesikhondlakhondla esimasondo-sondo seqembu likaKhongolose sakhelwa, sasungulwa lapha phezu komfula uMzinyathi, esigodini sikaMafukuzela onjengeZulu, eNanda Mission, ngiyazibuza ngiyaziphendula.


Ngiyazi lokhu kungezwakala njengempicabadala yoqobo okwamanje, ngoba nakhu phela kuthi kuzanywa ukunqanda lezizingane zethu eziziphahlukelayo futhi zigcwaneka nje esidlangalaleni, kube futhi ngapha kukhalinywa lemidodovu yamakhehla esabisa ngokuthandazela ukushabalala nokufa kweqembu elazabalazela lonke uquqaba lakulelizwe ukuze liphume emaketangweni obandlululo.

Kodwa-ke ubuhle besiZulu abungathekiswa, futhi zonke lezivunguvungu zizoshabalala kungekudala. Yingakho nje ngingathanda ukucaphuma izinhlamvu ezabe zihaywa iNdlovukazi yoMculo esikobandayo uMrriam Makeba lapho ethi;"Nathula nje Magwala ndini, nazi izinkomo zobaba zizomuka nabafokazana? "

Zolo lokhu, oyisazi ngokwakha amaqhinga-ngqangi okudla umhlanganiso (Political Campaigns: Getting Started, Strategy & Planning) umnumzane Benjamini A. Katz, uphakamisa ukuthi noma ngabe izimo sezizimbi futhi zikuphendukele kangakanani njengomholi, akusafanele ushaywe luvalo.
"Kufanele ngesikhathi izimbangi zakho zisashaya umkhulungwane, ziphaphame lapho abakwesekayo sebekuthwele emahlombe njengomholi wabo-- kungabe sekuqaliwe nama akukaqalwa ukukhankasa- inqobo nje uma besakholelwa ebuholini bakho" uyichaza kanje lenselelo.
IYAPHELA
------------------------------

-----------------------------------------8888888888----------------------------------------------
{NB: Ngokwencazelo ekhishwe ngabakwaWikipedia "UKUKHANKASA NGOKWEZEPOLITIKI" kusho ukufuqa umkhankaso ohleliwe, wahlelisiswa lapho niphokophelele ukuthi makuthathwe isinqumo esizovuma uhlangothi oluthile enikholelwa kulo eqembini elithilwe ngalesosikhathi}

Kubhale: Nkonzwenhle "Qadi Maqadini" Mqadi
UMbhali ozimele waseThekwini
Cell: 0795010296 / 0825816323